خلى العيش حرام

صورة العضو الشخصية
محمد حامد جمعه
صحفــــي
مشاركات: 22
اشترك في: الخميس نوفمبر 25, 2004 5:08 pm


مكان: sudan
اتصال:

خلى العيش حرام

مشاركة غير مقروءة بواسطة محمد حامد جمعه » الاثنين ديسمبر 27, 2004 1:39 pm

<center>

الدنيا رأس ..........سنة ...........يعنى شنو ...
شخصيا ما عارف ليه الناس يحتفل بنهاية السنة
وأنها (شتت ) ما المسالة كلها يوم مشى وانقضى
وبقى شاهد عليك وخصما منك وبيجرك نحو قبرك
وأخر العمر طويل أم قصير كفن من طرف السوق
وشبر في المقابر . كما يقول الراحل صلاح احمد إبراهيم .
لكن السودانيين و(السودانية ) بقو يسو البدع .........
يعنى هسة في يوم 30 /12 تلقى الشمع دخل السوق
الأسود والبيض بقى ملون (حليل الجنا جداد ) وتلقى
الناس منتظرة الساعة (12 ) وملموة حول الشموع
وتعاين في ساعات الحيط وفجأة ........بوووووووووووم
.........وتسمع .....
شااااااااااااك ......وهيييييييييييه والشمع ...
هوووووووووووووف جاك طفى ونفخ ، طبعا العبد لله
زول خلا والمدينة دى وطلاميسها دى ما خاشة رأسنا بقرش ،
اها في جماعة كدا فضلت خيركم عزمونا السنة الفاتت
(ترويسة ) طبعا ختيت شروط واضحة وصارمة اول
تبادى اى شراب كدا فيها (حماض ) انا بره .. ..
شربوت ولا ما شربوت المهم اى شى بيخش
الراس ما يكون فى ، تانى البنوت المعزومات في
الترويسة يجن شايلات (تواكيل شرعية ) واذونات
خروج من ابهاتهن وكدا ويكونن لابسات (لبس )
مش الواحدة تجينا فى نص الزيفة
والسقط دا لابسة لينا (4 – 2-4 ) ولبساتهم ألعندها
اسامى غريبة كدا زى (وليان مافى ) و(نيفاشا )
و (السلام تم ) و ( العجب ) و(خلى العيش حرام )
والاخيرة دى كنت عارف انها اغنية بتاعة حقيبة لكن
هسة (الله يرحم ) بقت زى ولبسة قدر ما اعاين بنت
لباسها استغرب دى دخلت فى الهدوم دى كيف لأنها
محذقة لدرجة انو الواحدة لو كرعت من
شراب بيبسي ..........اللبسة بتشرط .
المهم توكلت على الحي الدائم ووزعت شروطي
وجيت ليكم حفلة الترويسة الكانت جلسة (حلوة ) في بيت
وأسرة زول صاحبنا وكنت بالجد شاعر بملل لأنو الفكرة من
أصلها ما خاشة راسي من (قولة تيت ) لكن صبرت وجابو ليك
الشمع والتورتات وهاك يا رقيص ويا غنا وصفقة والناس
لا خلت (نبق ) ولا دوم ولا نيم ، شتتو كلو وانا واقف فى
الطرف زى رجل الخط بتاع الكورة
اها قلت اتخارج برااااااااااحة .....
المسالة والطرب يمشى بالناس الضاجة دى
لقدام شوية يقوموا ينبسطو (اوى ) تكبس علينا كبسة
(نظام عام ) تخلينا نخش السنة الجديدة بكم سوط
وببطاقة ضامن من الحراسة !
اها يا زول طوالى (قديت ) ومشيت لكن عليكم امان الله
بس مرقت الشارع كدا صادفت ليك بوكس سايقو واحد
حنكوش كدا شبكنى ليك .....زح يا عمك ....وطاااااااااااخ لقيت
ليك يمكن دستة بيض ..كش كراش ......
فقعت ليك فوق جبهتى وصلعتى (الناشئة ) والصاعدة .......
يا سلااااااااااااااااااااااااااااااااااااااام يا اولاد .........
بس امسكتها قبال ما اتمها (مافى داعى ) الناس مبسوطة
ودى اجيال جديدة ومنتعشة و(بالها رايق )
يعنى اجيال كدا خالية من دسم ودهون السياسة ويمكن
(الهلال والمريخ ) وبقية الامراض السودانية
المستوطنة فينا ........ضحكت منهم ..
وغفرت ليهم ...الله يخليهم
ويكبروا ويجدوا البلد دى (فى ) وإنشاء الله
الكبار (يختو الرحمن )
في قلبهم ويفروا مستقبل زاهر ومشرق للجميع ........
لكن بالجد يا جماعة راس السنة فى السودان بقت فيهو
حاجات عجيبة يعنى السنة الفاتت برضو لمن وصلت البيت
لقيت ليك ( جدنا ) الجاى من البلد (كرت ) فى مهمة علاج
واقف قدام باب الشارع واول ما شافنى بادرنى بلهفة
وقلق ...ها الول ..يقصد يا ولد ..مالكو ... الماتو منو ...
الحلة دى عوينها وجالها ليهم ساعة ولا ساعتين بكوركو ..

صورة العضو الشخصية
Ali
.
.
مشاركات: 2
اشترك في: الخميس أغسطس 19, 2004 2:01 pm


اتصال:

Re: خلى العيش حرام

مشاركة غير مقروءة بواسطة Ali » الثلاثاء ديسمبر 28, 2004 9:31 am

محمد حامد جمعه كتب:<center>




لمن وصلت البيت
لقيت ليك ( جدنا ) الجاى من البلد (كرت ) فى مهمة علاج
واقف قدام باب الشارع واول ما شافنى بادرنى بلهفة
وقلق ...ها الول ..يقصد يا ولد ..مالكو ... الماتو منو ...
الحلة دى عوينها وجالها ليهم ساعة ولا ساعتين بكوركو ..
<center>
تسلم يا محمد للامتاع


وكل سنه والجميع بخير


طبعاً ببارك لعيد الاستقلال ها ها ها


:D

أضف رد جديد