كتكوت

صورة العضو الشخصية
لؤي الصادق
.
.
مشاركات: 72
اشترك في: الجمعة يناير 29, 2016 10:51 am


اتصال:

كتكوت

مشاركة غير مقروءة بواسطة لؤي الصادق » الأربعاء أغسطس 16, 2017 3:29 pm

كانت احدى النساء تعوس في الكسرة فجاء (كتكوت ) ودخل تحت الصاج
حكت المرأة تلك الحادثة لابنها فكتب قصيدة يرثي فيها الكتكوت مطلعها ( سوسيو انتحر تحت الصاج ) وانا الان اقدم هذه الاسئلة لذلك الكتكوت عليه الرحمه .
ليه يا كتكوت ؟
انتحرت تحت الصاج ؟
أظنك يا كتكوت
زرت (محاسن )
شارب حاجة
بالع خرشه
مسوي مزاج
يا كتكوت
والله أكيدة
انت بتقراء عن (حميدة )
ادعشتن عقلك وفكرك لاج
ما تقولي يا كتكوت
انت حزين
على المحجوب
وإسماعيل
معاه عبود
كمان أب عاج
احمد ربك
حاكمك عمر
ما الحجاج
ليه يا كتكوت ؟
انتحرت تحت الصاج ؟
أتخرجت ليك سنين ؟
وشغلك واسطات محتاج ؟
ليه يا كتكوت ؟
انتحرت تحت الصاج ؟
ما تكون يا كتكوت
دي امريكا
كاتمه انفاسك
وضاربه عليك سياج
وتقول لك اعمل واعمل
وهاريه ضهريك بالكرباج
ليه يا كتكوت ؟
انتحرت تحت الصاج ؟
يا كتكوت
انت بطينتك ؟
فيك تدوس ؟
انت وطينك ؟
حربه بسوس ؟
انت وطينك ؟
سارقاه لصوص ؟
انت وطينك ؟
حكماه مجوس ؟
انت وطينك ؟
شبابه اتغرب وما خلى فجاج
ليه يا كتكوت ؟
انتحرت تحت الصاج ؟
انت مهمش ؟
بتعاني اهمال
ساكن كاودا ؟
او ادغال ؟
جاتك كوليرا ؟
او قول اسهال ؟
بتموت وما لاقي علاج ؟
ليه يا كتكوت ؟
خايف بكرة
شايل سلفة ؟
ما لا قي السترة
عليك اقساط ؟
ساكن اجره ؟
وجوه المطرة
يوماتي خواج
ليه يا كتكوت ؟
انتحرت تحت الصاج ؟
بريدك يابلد
ما اصلو ريدك قبلي اتولد
الدنيا قبال اجيها
رضعت نيلاً بجري فيها
وما انفطمت للابد